Anei tētahi ahi kē – ehara i te ahi i te Inch Bar, i te wāhi ka hui ngātahi mātou ia Wenerei, ia Wenerei – e kāo, ko tēnei te ahi i tōku kāinga, i te whitu karaka i te ata, i te Rāhoroi, i te marama a Here-turi-kōkā… e ai ki te kōrero, ko tēnei te marama ka noho tonu ngā tāngata e piri tata ana ki te ahi, ā, ka wera ai ngā turi… kāore i tino wera rawa atu aku ake turi, engari āhua makariri tonu ki waho ( i puta mai te hukarere i konei i tērā atu wiki). Ka kitea te hukapapa kei waho, ahakoa he iti.
Ka whitawhita tonu te ahi kaingākau i te reo Māori hoki. I tērā pō, i mātaki au i a Hinurewa Poutu e kauhau ana mō ana rangahau e pā ana ki ngā ‘pīpī’ o ngā wharekura (he ‘raukura’ hoki – ko ngā mea e pīkau ana i ngā tūmanako me ngā moemoeā mō te oranga tonutanga o te reo Māori). Ko ngā pakeke te tino kaupapa o taku rangahau e pā ana ki te reo Māori, otirā, he pai te rongo kōrero mō ngā rangatahi. E ai ki a Hinurewa, ko ngā pīpī ngā manu iti noa iho, engari he kupu hoki a ‘pīpī’ mō ngā toa rangatahi e haere ana i mua o te ope whawhai ki te pakanga. Ko te raru (e ai ki ētahi), kāore ēnei i te tino ū ki te kōrero Māori i ētahi wā, mena e kōrero tahi rātou ko ko ō rātou hoa. Nō reira, ko tak akiaki nei, whakarongo ki ana kōrero mō te kaupapa nei (ko te reo Pākehā te reo e kawe ana i ōna whakaaro i te kauhau nei, ahakoa ko te reo Māori te whiu i tonā tuhinga roa mō te PhD).
Kei konei te herenga ki tētahi atu kōrero mōna, mō ana rangahau hoki. E ai ki a ia, ko te mea nui kia whaka-cool-ngia te reo mō ngā rangatahi…
Mauri ora tātou…
Āhua mōhio 